30-anyos na lalaki, dinedo ng pamangkin

MANILA, Philippines - Isang 30-anyos na lalaki ang pinatay sa saksak ng kanyang sariling pamangkin matapos umanong tangkain ng una na awatin ang huli sa pakikipag-away kahapon sa Pasay City.

Patay na nang idating sa Pasay City General Hospital ang biktimang si Edwardo Con­cepcion, ng P. Manahan St., ng naturang lungsod sanhi ng tina­ mo nitong malalalim na saksak sa iba’t ibang bahagi ng kata­wan nito. Kasalukuyan namang naka­kulong sa detention cell ng Pasay City Police ng suspek na kinilalang si Eugene Renozo, alias “Batotoy”, 18, binata at na­ninirahan sa nabanggit na lugar.

Batay sa ulat, naganap ang insidente dakong ala-1:30 ng hapon sa kahabaan ng P. Ma­nahan St., Pasay City.

Bago maganap ang pag­patay, magkasamang nag-iinu­man si  Renozo at ilang kaibi­gan nito, sandaling nagpaalam ang suspek at pinuntahan nito ang kaibigang si  Rafael Alberto, 21, upang magsanla ng kan­yang relo at kwintas subalit hindi umano napagbigyan ni Alberto ang suspek dahil wala pa itong pera na siya namang ikinagalit ng suspek.

Nagwala umano ang sus­pek at tinangka nitong hatawin ng tubo si Alberto, subalit tiyem­po namang napadaan sa natu­rang lugar ang tiyuhin at inawat nito ang pamangking si Renozo.

Nakatikim din ng sermon ang suspect sa tiyo dahil sa paglalasing nito, nagalit umano ang suspect kung saan kumuha ito ng patalim at agad na inun­dayan ng saksak ang tiyuhin.

Tinangka pang isugod sa naturang pagamutan ang dugu­ang biktima ng mga nagres­pondeng barangay tanod su­balit hindi na ito umabot nang buhay.  Hindi naman nakapalag ang suspek ng ito ay arestuhin. (Lordeth Bonilla)