Mister todas sa motorsiklo

MANILA, Philippines - Isang 58 -anyos na mister ang nasawi matapos na ma­bundol ng rumaragasang mo­tor­siklo habang siya ay papa­tawid sa may Araneta Avenue sa lungsod Quezon kahapon ng madaling araw.

Nakilala ang biktima na si Conrado Tuldog, vendor ng # 57 BMA St., sa lungsod.

Habang sugatan din ang driver ng nakabanggang motor­siklo na si Orven Viajar, 29, empleyado ng Isla Puting Bato, Tondo Manila na nilala­patan ng lunas sa Philippine Orthopedic Center.

Ayon kay SPO2 Felix S. Baxinela, ng traffic sector 4 ng Quezon City Police, nangyari ang insidente sa may Araneta Avenue, at Banawe St., ganap na alas- 4 ng madaling araw.

Sinasabing sakay ng kan­yang motorsiklo (2918-TA) ang suspek at tinatahak ang naturang lugar nang pagsapit sa Banawe St., ay biglang na­bundol nito ang biktima na noon ay papatawid naman sa lugar.

Sa lakas ng pagkaka­bangga ay kapwa tumilapon ang dalawa hanggang sa itakbo sila sa JRMMC para lapatan ng lunas kung saan nasawi ang biktima, habang inilipat naman sa Orthopedic ang suspek.

Kasong reckless imprudence resulting in homicide ang kinakaharap ngayon ni Viajar na nagpapagaling pa rin sa kan­yang sugat. (Ricky Tulipat)