MANILA, Philippines - Isang 63-anyos na lolo ang agad na nasawi makaraang barilin ng isa sa dalawang magkaangkas sa isang motorsiklo kahapon ng umaga sa Pateros St., Caloocan City.
Nakilala ang nasawi na si Emmanuel Ocampo ng Pasig Street, Barangay Maypajo ng naturang lungsod. Nagtamo ito ng tama ng bala sa ulo na agad na kumitil sa buhay nito.
Agad namang tumakas ang dalawang salarin sakay ng motorsiklong Honda XRM type na hindi na nakuha ang plaka.
Naglalakad pauwi ang biktima nang huminto sa tapat nito ang dalawang suspek at agad itong paputukan ng hindi mabatid na kalibre ng baril sa ulo bago mabilis na nagsitakas. (Danilo Garcia)