Dalagita kasabwat ng 3 holdaper

MANILA, Philippines - Nadakip ng pulisya sa isang follow-up operation ang tatlong holdaper na kinabibilangan ng isang menor de edad habang tinu­tukoy din ang pagka­kilanlan ng isang dalagita na sina­sabing kasabwat nila sa panghoholdap sa isang pampasaherong dyip sa Sta. Cruz, Manila ka­hapon ng madaling-araw.

Nakapiit sa Manila Police District-Women and Children Concern Division ang mga suspek na sina Richard Dacanay, 18, ng 2701 Lico St., Tondo; An­gelito Macabu­los, 20, ng 2632 Lico St., Tondo at isang 15-anyos na pina­nga­­lanang “Jeff”.

Positibong kinilala ng mga biktimang sina Loridyn Centillas, 21; Daisilyn Un­dato, 19, at Jocelyn Almo­nicar, 20, pawang resi­dente ng no. 21 ng Laong-laan St., Pajo, Caloocan City.

Sa ulat ni C/Insp Anita Araullo, hepe ng WCCD, na­ganap ang insidente da­kong ala-1:30 ng madaling araw sa loob ng isang pampasa­he­rong jeep­ney sa panulukan ng Rizal Avenue at Tambun­ting Street sa Sta Cruz.

Sa salaysay ng mga bik­tima, sakay sila ng pampa­saherong dyip nang suma­kay ang isang babaeng pasa­hero pero hindi pa man na­ka­kalayo ang sa­sakyan ay bigla nitong pi­na­para ang jeep at bumaba na nagda­hilan na may na­kalimutan siya.

Sa puntong iyon ay na­kaabang naman sa ma­dilim na bahagi ng Tambun­ting ang tatlong suspek na ma­bilis na sumampa sa jeep­ney pagbaba ng ka­sabwat na babae.

Agad umanong nagdek­lara ng holdap ang tatlo at kinolekta ang tinatayang P5,000 cash at cellphone ng mga biktima.

Nang magsipulasan na ang mga suspek ay agad nagsumbong ang mga bik­tima sa nagrorondang ba­ran­gay tanod na sina Fer­dinand Lanon at Rodolfo de Guzman, kapwa sa Bgy 375 Zone 38.

Mabilis na nakipag-ugnayan ang mga tanod sa Bgy. 210 na pinamumu­nuan ni Chairwoman Josie Lo­zano na sinasabing kila­lang residente niya ang mga suspek base sa pagla­lara­wan ng mga biktima.

Nang maaresto ang mga suspek ay narekober pa ang natangay na Nokia N-70 series na pag-aari ng isa sa biktima subalit wala na ang natangay na cash.

Aminado ang mga tanod na takot ang mga jeepney driver sa bahagi ng Tambun­ting at hindi nagsasakay ng mga kala­lakihan sa disoras ng gabi o madaling-araw dahil sa talamak na holdapan.

Naniniwala sila na dahil sa ginamit na babaeng nag­panggap na pasahero kaya nagkaroon ng pagka­ka­taong makapang­holdap ang mga suspek. (Ludy Bermudo)