Lider ng drug syndicate, todas sa engkuwentro

MANILA, Philippines - Nabuwag na ang kilabot na sindikato ng droga na ti­naguriang “Manap Drug group” na nag-ooperate sa Cabadbaran City matapos na masawi sa engkwentro ang itinuturing na lider nito sa pagitan ng tropa ng Philippine Drug Enforcement Agency (PDEA) Regional Office 13 makaraan ang buy-bust ope­ration sa Agusan del Norte kamakalawa.

Kinilala ni PDEA Director/General Senior Undersecre­tary Dionisio R. Santiago, ang nasawi na si Ali Manap, lider of the Manap drug group. 

Ayon kay Santiago, si Manap ang target ng operas­yon ng grupo dahil kasama ito sa listahan ng most wanted drug personalities sa rehiyon.

Arestado rin ang mga ka­samahan nitong sina Camar Gumama, Ajid Tanday at Samshia Nasser, gayundin ang dalawang menor de edad na lalaki.

Nag-ugat ang insidente nang magsagawa ng buy-bust operation ang nasabing tropa sa may  Brgy. Matabao, Buenavista pasado alas- 10 ng gabi.

Bago nito, nakatanggap umano ng impormasyon ang mga awtoridad na si Manap ay nagtatago sa nasabing lugar upang agad na magsa­gawa ng surveillance. At nang maging positibo ay saka isina­gawa ang buy-bust operation.

Sinasabing isang poseur buyer ang nagpanggap na bibili ng droga kay Manap ngunit nang makapalitan ng items ay nakatunog na ito at pinaputukan ang mga awtori­dad dahilan upang gumanti ng putok ang mga huli at ma­patay ang suspect.

Matapos ang palitan ng putok ay nakitang nakabu­lagta si Manap habang ang ibang kasamahan nito ay kusa namang sumuko.

Nakumpiska sa mga sus­pek ang isang piraso ng plastic sachet ng shabu; isang piraso ng P500 marked money; isang unit ng Nokia 1200; isang wallet at isang kalibre .45  pistola, na siyang ginamit ni Ali sa pakikipag­barilan sa awtoridad. (Ricky Tulipat)