MANILA, Philippines - Nasa bansa pa at kinakanlong ng maimpluwensyang grupo si Jason Ivler, ang umano’y killer ng anak ng Malacañang official, kung kaya nagiging madulas ito sa batas at patuloy na nakapagtatago.
Ito ang sinabi ni Senior Supt. Audie Arroyo, deputy chief ng QCPD, makaraan ang pagkabigong makuha si Ivler nang salakayin ang tatlong bahay na pinaniniwalaang kinaroroonan nito sa # 23 at # 63 Hillside Drive sa Blue Ridge A. Village sa lungsod kamakalawa ng gabi.
Ayon kay Arroyo, ang naturang maimpluwensyang grupo ang sinasabing nagtatago kay Ivler, base sa pahayag umano ng kanyang inang si Marlene Aguilar. Hindi naman tinukoy ni Arroyo kung anong grupo ang nasabing may hawak dito.
Gayunman,dagdag ng opisyal, magsasagawa pa rin sila ng pagsisiyasat kaugnay sa pahayag ng ginang upang mapatunayan nila kung tutuo ang nasabing alegasyon.
“We are verifying a statement made by Ivler’s mother, Marlene Aguilar-Pollard, that her son is in the custody of influential people,” sabi ni Arroyo.
Bukod dito, may kakayahan din umanong maging agresibo at mabilis sa pagtakas si Ivler dahil nag-training umano ito sa US Army bilang reservist.
Bitbit ang warrant of arrest sa kasong homicide case na isinampa laban sa kanya noong 2004, sinalakay ng QCPD kamakalawa ng gabi ang tatlong bahay sa Hillside Street, Blueridge Subdivision A sa lungsod. Ngunit, tulad ng dati, nabigo ang tropa na makuha si Ivler. (Ricky Tulipat)