Bisor lasog sa 2 sasakyan

MANILA, Philippines - Patay agad ang isang supervisor matapos na sal­pukin umano ang minama­neho nitong motorsiklo ng isang rumaragasang pampa­sa­herong bus saka muling mabundol ng isa pang kotse habang tinatahak ang kaha­baan ng Edsa sa lungsod Quezon kamakalawa.

Ayon sa ulat ng Traffic Sector 6 ng Quezon City Police, dead-on-the-spot sa lugar si Gerardo Teongson,44, supervisor ng Samsung at residente ng Road 10, Ba­gong Pag-asa sa lungsod.

Patuloy naman ang pa­nga­ngalap ng impormasyon ng awtoridad upang matukoy ang nakabundol na bus na mabilis na humarurot makara­ang ang nasabing insidente.

Samantala ang driver naman ng Nissan Sentra (TYG-885) na nakahagip din sa biktima ay nasa kustodiya na ng pulisya at ito ay kinila­lang si Mario Ujano, 41.

Naganap ang insidente sa may kahabaan ng Edsa, par­tikular sa Quezon Avenue Flyover sa lungsod pasado alas-9 ng gabi.

Diumano, tinatahak ng bik­tima sakay ng kanyang motor­siklong Honda MC-TMX (NA-8227) ang nasabing lugar nang bundulin ito ng pampa­saherong bus.

Sa pagkakabundol sa motor ng biktima, ay nagpage­wang-gewang ito hanggang sa mabundol muli ng Nissan Sentra bago tuluyang buma­landra ang katawan nito sa bangketa. Dahil sa matinding impact, nagkalasug-lasog ang katawan ng biktima na siyang agad na ikinamatay nito. (Ricky Tulipat)