Donation box ng simbahan, tinira

MANILA, Philippines - Dahil umano sa nais na maipagamot ang sugatang paa, natukso ang isang lalaki na dukutin ang donation box ng simbahan, na nagdahilan pang nainip siya sa pagta­tapos ng misa upang humingi ng tulong sa pari, sa Ermita, Maynila, kamakalawa ng umaga.

Kinilala ang suspek na si John Rey Adriano, 32, ng Ge­neral de Leon St., Valenzuela City.

Sa reklamong idinulog ng Parish co­ordinator ng San Agustin Church na si Linda Rivera, dakong ala-9 ng umaga nang maganap ang pagdistrungka ng donation box sa loob ng nasabing simbahan.

Sinabi ni Rivera na narinig niya ang mga kalansing ng pera na nagmula sa nakahi­gang Poong Hesukristo kaya nang inalam ay na­kitang nakabukas na ang donation box sa ibaba nito at ang sus­pek ang huling nakita niyang galing doon. Agad ipinagbigay-alam ni Rivera sa mga barangay tanod ang ginawa ng suspek kaya ito hinabol at inaresto.

Narekober sa suspek ang 20 pirasong US dollars; Hong Kong coins at 5 pirasong tig-P100 bills at screw driver na ipinambukas sa donation box.

Aminado ang suspek na ninakaw niya ang abuloy at idinahilan na pambili ng gamot sa namamagang paa. (Ludy Bermudo)