Networking firm ipapaimbestiga

MANILA, Philippines - Bunsod na rin ng umano’y pananakot sa mga nire-recruit, nais ni Acting Manila Mayor Francisco Moreno na imbestigahan ang Unlimited Networking Opportunities International Corp.

Sinabi ni Moreno na isasagawa ang naturang hakbang dahil sa apela ni Gerry Ranoa, 18, estudyante ng Far Eastern University na biktima ng pyramiding at inagrabyado umano ni Larry Bitara 24, matapos na sapilitan umano nitong kunin ang kanyang salapi, laptop at relos kung hindi sasali sa networking.

Sinabi ni Ranoa na kasinungaling ang mga unang ipinahayag ni Bitara kung saan pinagbintangan pa nito ang mga pulis na nanakit at kukuha ng kanyang pera na nagkakahalaga ng P7,000.

Iginiit naman ni Moreno na kailangan na agad na maibestigahan ng National Bureau of Investigation ang mga networking company lalo pa’t nagre-recruit ng mga menor de edad o mga estudyante. (Doris Franche)