MANILA, Philippines - Naaresto ng mga operatiba ng Manila Police District (MPD) ang isang traffic police matapos itong maaktuhang nangongotong ng halagang P20 sa isang truck driver sa isinagawang entrapment operation kamakalawa ng hapon sa Ermita, Maynila.
Nahaharap sa kasong robbery extortion ang suspek na si SPO2 Carlos Sta. Ana ng Quiapo, Maynila matapos itong ireklamo ni Marlon Garcia, 45, ng Baseco Com pound Port Area, Manila.
Sa imbestigasyon, dakong alas-4:45 ng hapon ng arestuhin ang suspek sa panulukan ng P. Burgos St. at Finance Road Ermita, Maynila.
Nakatanggap umano ng impormasyon ang pulisya mula sa Manila City Hall tungkol sa ginagawang pangongotong ni Sta. Ana sa mga dumadaang truck sa naturang lugar kayat kaagad nagsagawa ng entrapment operation laban dito.
Narekober naman mula kay Sta. Ana ang P20 marked money na iniabot ni Garcia. (Gemma Amargo-Garcia at Ludy Bermudo)