MANILA, Philippines - Arestado ang dalawang hinihinalang drug pushers makaraang makuhanan ang mga ito ng may 10 kilo ng marijuana sa lungsod ng Quezon kamakalawa.
Kinilala ang mga nadakip na suspek na sina Inocencio Hunggayo,18; at Jose Ireneo, 30; kapwa residente ng Vanguard St., Camarin Caloocan City.
Ayon sa pulisya, nadakip ang mga suspek makaraang isang impormante ang tumawag sa pulisya na may transaksyon ng droga na magaganap sa Hotel Moko sa Brgy. Sta. Monica, Novaliches.
Agad namang inihanda ang operation pasado alas- 8 ng gabi sa nasabing lugar kung saan naaktuhang nagbebenta ang mga suspek ng bloke-blokeng marijuana sa naturang lugar.
May kabuuang halagang P40,000 ang nakumpiska sa nasabing mga suspek.
Sa imbestigasyon ng pulisya, ang naturang droga ay mula pa sa Benguet province na ibinibenta naman ng suspek sa nasabing lugar sa presyong P3,000 kada kilo. (Ricky Tulipat)