Tractor vs motorsiklo: 2 patay

MANILA, Philippines - Dalawa ang nasawi, habang isa pa ang nasa kritikal na kon­disyon nang masagi ang ka­nilang sinasakyang motorsiklo ng tractor truck, sa bahagi ng Tondo, Maynila, kamakalawa ng gabi.

Nakilala ang mga nasawi na sina Reynaldo Reyes Jr., 51, at Jenny Montejo, 19. Kritikal pa rin sa naturang ospital ang kapatid ni Jenny na si Jessica Montejo, 15. Agad namang su­muko sa awtoridad ang driver ng truck na si Wilson Bernillo, 37, nagma­maneho ng tractor (UNZ 718). Sa ulat ng pulisya, dakong alas-7 ng gabi nang ma­ganap ang insidente sa pa­nulukan ng Radial 10 at Chesa Sts., Tondo, Maynila.

Nabatid na ang mga biktima ay sakay ng isang motorsiklo (UF 3668) sa direksiyon ng north bound gayundin ang mina­manehong tractor ng sus­pek nang aksi­den­teng masagi umano ng hara­pang gulong ng kanyang sasak­yan ang motor­siklo na minama­neho ni Reyes dahilan upang tumilapon ang tatlo. (Ludy Bermudo)