MANILA, Philippines - Isang ama ang nasawi makaraang pagbalingang barilin ng isang lalaking nakaaway ng kanyang anak sa lungsod Quezon kamakalawa.
Isang tama ng bala sa dibdib ang tumapos sa buhay ng biktimang si Ferdinand Racho, 44, mason, ng Saint Andrew, Brgy. Holy Spirit sa lungsod.
Nakatakas naman ang suspek na si Lousito Garcia, 36, construction worker ng nasabi ring barangay.
Sa ulat ng pulisya, naganap ang insidente sa mismong lugar ng biktima pasado alas-6:30 ng gabi.
Bago nito, nagkaroon umano ng hindi pagkakaunawaan ang anak ng nasawi at ang suspect.
Agad na nagbunot ng baril ang suspect at itinutok sa anak ng biktima gayunman nakatakbo ito.
Hinanap ito ng suspect hanggang sa ang masalubong ay ang matandang Racho na siyang pinagbalingan ng suspect at agad itong binaril. Mabilis na tumakas ang suspect matapos ang ginawang krimen.
Nagawa pang maitakbo ng mga residente sa Malvar General Hospital ang biktima ngunit idineklara din itong patay. Nakuha ng mga awtoridad ang isang basyo ng kalibre 38 baril na ginamit sa pamamaril sa biktima.