MANILA, Philippines - Dahil sa umano’y panliligaw sa kanyang misis, pinagsasaksak ng isang 36-anyos na lalaki ang kanyang kapitbahay habang umiihi ito, kahapon ng madaling-araw sa Pasay City.
Kritikal ngayon dahil sa tatlong tama ng saksak sa likod ang biktimang si Gary, ng Harrison Donald Compound sa may FB Harrison St., Pasay City. Nakaratay ito ngayon sa Pasay City General Hospital.
Agad namang tumakas matapos ang pananaksak ang suspect na nakilalang si Carlito Cielo, naninirahan din sa naturang compound, bitbit ang ginamit na armas
Sa imbestigasyon ng pulisya, naganap ang insidente sa madilim na bahagi ng Donald Compound sa F.B. Harrison dakong alas-4:30 ng madaling-araw habang umiihi ang biktima sa naturang lugar nang bigla na lamang lapitan ng suspect at undayan ng tatlong saksak.
Lumalabas sa imbestigasyon na matagal nang may galit ang suspek sa biktima dahil sa mga sumbong na nanliligaw at pilit na sinusulot nito ang misis ng una ngunit hindi makumpronta ng harapan dahil sa kilalang siga ito sa lugar. Maaaring sinamantala umano ng suspek ang pagkakataon habang abala ang biktima sa pag-ihi at doon ito inundayan ng saksak. (Danilo Garcia)