MANILA, Philippines - Isang tricycle driver ang nasawi matapos na pagsasaksakin ng isang lalaki habang ang una ay nanonood ng sugal na mahjong sa kanyang kapitbahay sa lungsod Quezon kamakalawa.
Kinilala ang biktima na si Ramilito Valdez, 36, may-asawa ng Brgy. Culiat sa lungsod.
Pinaghahanap naman ang suspek na nakilala sa pangalang Jojit Duran, na mabilis na tumakas makaraan ang krimen
Ayon sa ulat, nangyari ang insidente malapit sa bahay ng biktima ganap na alas-6 ng gabi.
Bago nito, nanood ng mahjong ang biktima sa mga naglalarong kapitbahay nang biglang sumulpot ang suspek na armado ng patalim at inundayan ito ng sunud-sunod na saksak sa katawan.
Patuloy ang imbestigasyon ng awtoridad sa nasabing insidente upang maaresto ang suspek at matukoy ang motibo ng pamamaslang sa biktima. (Ricky Tulipat)