MANILA, Philippines - Arestado ang tatlong hinihinalang miyembro ng “Ativan gang” matapos bik timahin ang isang Koreana sa Quezon City.
Kinilala ang mga suspek na sina Diana Santos, 34, Michael Magtuto, 24; at Marlon Cruz, 33, pawang taga-Araneta Ave., Brgy. Tatalon, Quezon City.
Kinilala naman ang biktima na si Kim Min Jeong, Korean national, 32, na nasa pangangalaga na ng District Police Intelligence Operating Unit ng Quezon City police.
Batay sa ginawang imbestigasyon, nilapitan umano ng mga suspek ang biktima sa Luneta, Maynila at nagpakilalang tourist guide at dahil dito ay madali raw napalagay ang loob ng dayuhan sa tatlo dahil mababait naman daw ang mga ito.
Pinasyal pa umano ng mga suspek ang biktima sa iba’t ibang lugar sa Maynila hanggang sa magtungo sila sa Scotch videoke bar sa Banawe, Quezon City at dito na umano nilagyan ng mga suspek ang inuming beer ng biktima ng ativan na isang uri ng sleeping pill.
Nakita raw ng mga ibang kostumer sa nasabing videoke bar ang ginawang paglalagay ng tableta sa inumin ng biktima dahilan para magsumbong ang mga ito sa mga awtoridad dahilan para maaresto ang mga suspek. (Angie dela Cruz)