MANILA, Philippines - Napugot ang ulo at nadurog ang katawan ng isang 74-anyos na lola na sinasabing mahina ang pandinig, nang mahagip at makaladkad ng rumaragasang bagong Philippine National Railways (PNR) train sa Sampaloc, Maynila, kahapon ng umaga.
Dead-on-the-spot ang biktima na kinilalang si Virginia Macahilig, caretaker ng 1126 Prudencio st., Sampaloc.
Sa pagresponde ni SPO4 Jessie Oliveros, ng Manila Police District-station 4, naganap ang insidente dakong alas-8:45 ng umaga, habang papatawid sa may riles ng tren sa kahabaan ng Piy Margal St., Sampaloc, ang biktima nang salpukin ng rumaragasang tren na nagmula sa Alabang patungong Tutuban.
Sa panayam kay Manila Traffic Bureau, SPO1 Demetrio Bunquin, nakaladkad ng halos 20 metro ang biktima matapos itong mahagip ng tren.
Ayon sa mga residente, hindi umano marahil narinig ng matanda ang malakas na busina ng tren dahil sa mahinang pandinig, bunga ng katandaan.
Sa pakikipag-ugnayan ni SPO1 Bunquin sa PNR-Tutuban main office, natukoy ang driver ng train na si Dennis Capuz na sasampahan nila ng kasong reckless imprudence resulting in homicide.