MANILA, Philippines - Nahagip ng trailer truck habang papaliko ang minamanehong motorsiklo ng isang army reservist na kagyat na ikinasawi nito, sa Tondo, Maynila, kamakalawa ng gabi.
Dead-on-the-spot ang biktimang si Jimeney Abeltis ng 3-C Luzon St., Galas, Quezon City, base sa nakuhang identification card sa kanyang pitaka. Nakapiit na ang suspek na si Roldan Paghunasan, driver ng isang Fuso truck (ZKM7970) na may hilang trailer truck (PUV 575).
Ayon sa ulat, dakong alas-6:10 ng gabi nang maganap ang insidente sa Radial 10, Ton do, Maynila. Nabatid na binabagtas ng biktima sakay ng motorsiklo (7290 PS) ang Radial 10 nang mahagip ng rumaragasang trailer truck at nakaladkad pa ng ilang metro.
Mabilis namang nadakip ang driver ng naturang truck na nagtangka pang tumakas nang mamataan ng mga tauhan ng Manila Police District (MPD)-District Mobile Patrol Unit (DMPU). Kasong reckless imprudence resulting in homicide ang isinampa laban sa suspek. (Ludy Bermudo)