MANILA, Philippines - Pinaniwalaan na rin sa huli ang isang babaeng may diperensiya sa pag-iisip nang mapatunayang nagsasabi ito ng totoo na patay na ang kaniyang kapatid na lalaki sa Tondo, Maynila, sa ulat kahapon.
Hinihinalang may ilang araw nang patay ang biktimang si Noel Castillo, alyas “Jon-jon”, 31-anyos, binata, walang trabaho ng 485 Gate 20 Area-H. Parola compound, Tondo.
Dakong alas-3:00 ng hapon kamakalawa nang madiskubre ang pagkamatay ng biktima sa ikalawang palapag ng kanyang bahay.
Sa salaysay ni Nenita Guarde, tiyahin ng biktima, sinabi umano sa kaniya ng pamangking si Elena, nakatatandang kapatid ng biktima, na nakita niyang patay na si Noel.
Dahil sa may sakit sa pag-iisip ang dalaga, hindi umano ito pinaniwalaan subalit nang makaamoy ng tumitinding baho at masangsang, naghinala ang tiyahin na baka totoo ang sinasabi ng pamangkin.
Nang akyatin ang silid sa ikalawang palapag, nakitang nakabigti pa ang biktima sa nylon cord at masangsang na ang amoy.
Wala pang matukoy na dahilan o motibo sa pagpapatiwakal ng biktima. (Ludy Bermudo)