MANILA, Philippines - Pinasok at nilooban ng kilabot na “Gapos Gang” ang bahay ng konsehal at dating actor at singer na si Darius Razon na kasamang iginapos ng mga suspek kahapon ng umaga sa Mandaluyong City.
Sa kabila nito, nagpapasalamat pa rin si Razon (Darius Apacionado sa totoong buhay), 56-anyos, dahil buhay pa siya at mga kasambahay nang dumulog kahapon sa Mandaluyong City Police.
Ayon kay Razon, ginising pa siya sa pagkakatulog sa loob ng kanyang kuwarto kasama ang dalawang apo ng mga suspek na armado ng mga patalim.
Dito puwersahang tinanong si Apacionado kung nasaan ang kanyang pera na itinuro naman niya ang kinalalagyan.
Umaabot sa P500,000 cash ang tinangay ng mga magnanakaw ngunit maging ang kanyang cellphone ay tinangay rin ng mga suspek.
Sa kabila nito, iginapos pa ng mga salarin si Apacionado at ang kanyang dalawang apo na may edad na anim at pitong taong gulang at saka ikinulong sa loob ng banyo bago nagsitakas.
Nagawa lamang masaklolohan ng mga kapitbahay ang pamilya ng konsehal nang magsisigaw ang katulong na si Erlinda Caamic, 57-anyos, na ginapos rin ng mga salarin.
Sinabi ni Apacionado na mahigit sa tatlong magnanakaw ang nanloob sa kanyang bahay. Ilan sa kanila ay menor-de-edad at pinamumunuan ng isang may edad na.
Posible umanong mga kakilala rin ni Apacionado ang mga suspek at nabatid na may malaki siyang pera sa loob ng bahay.