MANILA, Philippines – Nalitson ang isang lola makaraang makulong ito ng buhay nang tangkaing balikan at iligtas ang mahahalagang kagamitan sa loob ng kanilang nasusunog na bahay, kahapon ng umaga sa Parañaque City.
Nakilala ang nasawi na si Luz Villafranca, 71. Nabatid na umabot ng halos dalawang oras bago pa nakuha ang bangkay ng matanda sa naabo nilang bahay sa Road 5A, United Parañaque Subdivision (UPS), San Dionisio, Parañaque City.
Ayon sa ulat, dakong alas-10:45 ng umaga nang magsimulang magliyab ang bahay ng pamilya Villafranca kung saan inabot ng halos dalawang oras bago tuluyang naapula ng mga pamatay-sunog ang apoy.
Napag-alaman pa na tanging ang pamangkin lamang ng matanda ang kasama nito sa bahay at wala rin ang una nang mangyari ang nasabing sakuna.
Ayon naman sa mga kapitbahay ng biktima, una umano nilang nakita ang matanda na nakalabas na sa nasusunog na bahay bagama’t ilang sandali pa ay nakitang pumasok ulit ito at tangkang isalba ang ilan nilang kagamitan. (Rose Tamayo-Tesoro)