MANILA, Philippines – Nasawi ang isang 40-anyos na pedicab driver matapos itong resbakan ng saksak ng kanyang sinaksak kamakalawa ng gabi sa Quiapo, Maynila.
Hindi na umabot ng buhay sa Jose Reyes Memorial Medical Center sanhi ng mga saksak sa katawan ang biktimang si Ruben Suela, ng Blk 48 Lot 2 Zone 7 Bautista, Dasmariñas, Cavite samantalang ginagamot din sa nasabing ospital ang suspek na si Antonio Salas, 26, ng #119 Pedrocos St. Quiapo bunsod ng isang saksak sa kanyang likuran.
Lumalabas sa imbestigasyon ni Det. Virgilio Martinez ng Manila Police District (MPD) Homicide Section, dakong alas-8 ng gabi nang maganap ang insidente sa panulukan ng Carlos Palanca at Gomez Sts., Quiapo, Maynila.
Bago maganap ang insidente magkasamang umiinom umano ng kape si Salas at kaibigan nitong si Danilo Boo nang bigla umanong dumating si Suela at walang sabi sabing sinaksak sa likod ang una.
Bagama’t sugatan si Salas ay kumuha ito ng patalim at hinabol si Suela na tumatakbo papatakas at nang maabutan ng una ang huli ay nauwi ito sa dwelo hanggang sa humandusay na duguan ang biktima.
Mabilis na isinugod ang dalawa sa nabatid na pagamutan subalit hindi na umabot ng buhay si Suela. (Gemma Amargo-Garcia)