3 miyembro ng 'Estribo gang' timbog
MANILA, Philippines – Tatlong miyembro ng Estribo Gang ang naaresto ng pulisya habang nakatakas ang lider ng mga ito makaraang biktimahin ang dalawang babae sa Caloocan City kamakalawa ng gabi.
Nakilala ang mga nadakip na sina Michael Simbulan, 36; Pedro Ramos, 27 at Jayson Bernabe, 20, pawang residente ng Phase 4, Bagong Silang ng lungsod na ito at nakatakas naman ang kanilang lider na si Alex San Andres.
Sa ulat ng pulisya, alas-10 ng gabi, sakay ng isang pampasaherong jeep ang mga biktimang sina Racquel Reoganis, 26 at Gloria Diva, 35, gayundin ang mga suspek, pagsapit sa Phase 1, Main Road, ay nagdeklara ng holdap ang mga ito.
Kinuha ng mga suspek ang mga cellphone, pera at gamit ng mga biktima bago tumakas habang nakahingi naman ng tulong sa mga pulis ang dalawang babae.
Agad na rumesponde ang mga pulis at naabutan ang tatlo at nabawi ang mga nakulimbat habang nakatakas ang lider ng mga ito. (Lordeth Bonilla)
- Latest
- Trending
