6 buwan suspensyon sa QCPD cops sa Failon case

MANILA, Philippines - Tuluyan ng pinatawan kahapon ng National Police Commission (Napolcom) ng anim na buwan na suspensiyon si P/Supt. Franklin Moises Mabanag at lima pang opisyal ng Quezon City Police District makaraang mapatunayang nagka­sala ang mga ito ng grave misconduct kaugnay sa ginawang pagmaltrato sa pag-aresto sa mga kaanak ng namayapang asawa ng broadcaster na si Ted Failon.

Batay sa 22-pahinang desisyon ng Napolcom, bukod sa suspensiyon, sinibak na rin sa kan­yang pwesto bilang hepe ng Criminal Investigation and Detection Unit (CIDU) si Mabanag at limang opisyal nito na sina P/Supt. Gerardo Ratuita, Chief Insp. Cherry Lou Donato, Chief Insp. Enrico Figue­roa, Senior Insp. Roberto Razon Sr., at Insp. Erlinda Garcia.

Samantala, ang tatlong pulis naman na sina Supt. Marcelino Pedroza, SPO2 Jerry Abada at PO2 Joycelyn Marcelo ay pinawalang-sala ng Napolcom.

Nabatid na ang naturang pagpapataw ng kapa­rusahan kay Mabanag at mga kasamahan nito ay batay sa lumabas na imbestigasyon ng Inspection, Monitoring and Investigation Services (IMIS) ng Napolcom dahil sa maling pag-aresto sa hipag at kasambahay ni Failon habang ang asawa ng huli ay nag-aagaw buhay sa New Era Medical Center sa Quezon City. (Rose Tamayo-Tesoro at Ricky Tulipat)