Shabu tiangge sa Pasig City muling sinalakay

MANILA, Philippines - Lumilitaw ngayon na bigo ang pamunuan ng Pasig City Government at Pasig police sa kampanya kontra iligal na droga matapos na madis­kubre na patuloy pa rin ang ope­rasyon ng malaking sindi­kato na nag-ooperate sa sinalakay na shabu tiangge matapos na muling lusubin ito ng Philippine Drug Enforce­ment Agency (PDEA).

Ayon kay Derrick Carreon, tagapagsalita ng PDEA, ang pagsalakay ay ginawa ng awto­ridad pasado alas-4 ng umaga sa may Mapayapa Compound na mata­tagpuan sa F. Soriano Street sa Sto. Tomas Village sa bisa ng search warrant na ipina­labas ni Judge Cie­lito Min­daro-Grulia of the Manila Regional Trial Court Branch 29.

Ito ay makaraang maka­tang­gap ng impormasyon ang PDEA hingil sa patuloy na pamamayagpag ng bentahan ng shabu sa lugar. Natagpuan ng mga awtoridad ang natu­rang droga na naka­silid sa limang plastic bags at naka­tago sa ilalim ng water tank na nasa bubungan ng nasabing bahay. Limang malalaking plastic sachet na naglalaman ng 200-300 gramo ng shabu ang na­kumpiska ng mga tauhan ng PDEA sa naturang operasyon sa apat na palapag na bahay ng hinihinalang drug master­mind na si Amin Imam Boratong.

Pitong kabataan naman ang dinakip ng mga operatiba at kasalukuyang isinasailalim sa berepikasyon upang ma­kilala at mabatid ang kaugna­yan ng mga ito sa iligal na operasyon.

Nabatid na target ng ope­rasyon ang isang nagnganga­lang Boy Negro at isang Umnin Salam Laduna na siyang nagpapatuloy ng ope­rasyon. Nakatakas naman sa naturang operasyon ang asawa ni Boratong na si Mimi.

Kinuwestiyon naman ni Pasig police chief, Supt. Ramon De Jesus ang ope­rasyon ng PDEA dahil sa natanggap lamang umano niya ang opisyal na komuni­kasyon para sa isasagawang operasyon kahapon ng umaga lamang kung saan tapos na ang pagsalakay.

Una nang sinalakay ng PDEA at ng Philippine Na­tional Police ang naturang shabu tiangge sa likod lamang ng Pasig City Hall noong Hunyo 2007 kung saan na­diskubre ang mala-paleng­keng sistema ng bentahan ng iligal na droga sa naturang compound.