MANILA, Philippines – Isang matandang lalake ang iniulat na nasawi makaraang tumalon mula sa ika-apat na palapag ng gusali ng isang kilalang mall sa Cubao sa lungsod Quezon kamakalawa.
Ang biktima na isinalarawan lamang sa edad na 50-60 anyos, may taas na 5’7, moreno, balingkinitan ang katawan at kalbo.
Ayon sa ulat ng pulisya, nangyari ang insidente sa may loob ng kilalang mall sa Cubao ganap na alas-9:05 ng gabi.
Diumano, bigla na lamang umanong lumusot sa iron grill ng ika-apat na palapag ng mall ang biktima at walang kaabog-abog na tumalon mula dito paibaba sa ground floor.
Ayon kay Jenisa Bea, security guard ng mall, kasalukuyang nagbabantay siya sa lugar nang makarinig siya ng isang malakas na kalabog mula sa nasabing lugar at nang kanyang siyasatin ay natuklasan niya ang biktima na nakahandusay sa lapag.
Mabilis na humingi si Bea ng saklolo sa iba pang kasamahan at itinakbo ang biktima sa Quirino Memorial Medical Hospital ngunit idineklara din itong dead on arrival.
Inaalam pa ng awtoridad ang pagkakakilanlan ng biktima gayundin ang motibo ng pagpapakamatay nito.