MANILA, Philippines – Butas ang bungo ng isang fish balll vendor na siyang agad na ikinamatay nito makaraang pagbuntunan ito ng galit ng isang sundalo ng Armed Forces of the Philippines at barilin habang nagtatalo ang huli at isa nitong kamag-anak sa lunsod ng Malabon kamakalawa ng gabi.
Kinilala ni Malabon City Police Chief Senior Supt. Roberto Villanueva ang nasawi na si Emmanuel Castro, 22, residente ng Brgy. Catmon sa naturang lunsod.
Arestado naman ang suspek na si Technical Sgt. Romeo dela Torre, 39, ng AFP Reserve Command at kapitbahay ng biktima.
Ayon sa ulat ng pulisya, nangyari ang insidente sa may Hernandez St. malapit sa bahay ng suspek at biktima.
Nauna rito, nagtatalo sina dela Torre at isang kamag-anak nito sa hindi malamang dahilan nang biglang mag-init at mapikon ang suspek. Nagkataon namang nasa nasabing lugar din si Castro na naglilinis ng kanyang kariton at napatingin sa kanila na lalong ikinainis ng suspek at ito ang pinagbalingang barilin sa ulo.