MANILA, Philippines - Isang Cessna ambulance plane ang umusok at umapoy matapos na pumutok ang gulong nito habang pa-take-off sa runway ng Ninoy Aquino International Airport (NAIA) sanhi nang pagtigil ng operasyon ng paliparan kamakalawa ng gabi.
Sa report na tinanggap ni Manila International Airport Authority General Manager Al Cusi, alas-8:15 ng gabi nang sumabog ang kaliwang landing gear ng IAIA-112A Westwind II aircraft na may Registry number N911GU sakay ng pilotong si Capt. Charles Kenward Cooper, co-pilot Tosihiro Shima at dalawang crew habang tumatakbo ang nasabing citation jet sa runway 24 ng NAIA paalis patungong Won Pat International Airport sa Guam.
Bago ang insidente, ang naturang eroplano ay nagbaba ng may sakit na pasyente sa Manila mula Guam kasama ang mga nurses na sina Eunice Neil at Mathew Keith.
Dahil sa biglang pagsabog ng gulong ay naglikha ito ng matinding usok at umapoy ang landing gear ng eroplano. Mabilis namang rumesponde ang MIAA rescue team sa runway at napatay ang apoy matapos na mahirapan ang mga crew na maapula ito sa pamamagitan ng kanilang fire extinguiser. Mabilis na nailigtas ang apat na sakay ng jet at walang nasugatan sa insidente.
Dahil sa pagbara sa runway ng nasabing eroplano ay naapektuhan ang operasyon ng NAIA Terminal 1, Centennial Terminal 2 at NAIA 3 sanhi upang matigil ang operasyon at ma-divert ang may 12 international at local flights sa Diosdado Macapagal International Airport (DMIA) sa Clark, Pampanga. Dakong alas-11 na ng gabi kamakalawa nang bumalik sa normal na operasyon ang NAIA. (Ellen Fernando)