MANILA, Philippines - Malubhang nasugatan ang isang tindero nang pagsasaksakin siya ng tatlong armadong lalake sa Pasay City kamakalawa ng gabi.
Ginagamot pa sa Pasay City General Hospital ang biktimang si Ericsson Yabut, 33, residente ng Malibay, Pasay City, habang isinusulat ito. Mabilis namang nakatakas ang mga suspek na nakilala lang sa alyas na Jon-jon, Abet at Jaime na pawang mga residente ng S. de Guzman St.
Lumilitaw sa imbestigasyon na naglalakad sina Yabut at ang live-in partner niyang si Jocelyn Pangilinan sa naturang lugar nang makasalubong nila ang mga suspek.
Kinompronta ng mga suspek si Yabut hinggil sa panliligaw umano niya sa isang Arnie na pinopormahan ng isa sa mga suspek.
Pinabulaanan ni Yabut ang akusasyon pero nagkaroon ng mainitang pagtatalo ang magkabilang panig hanggang pagsasaksakin ng mga suspek ang biktima. (Rose Tesoro)