Onsehan sa droga ugat sa Muntinlupa shootout

MANILA, Philippines - Onsehan sa droga ang naki­kitang motibo ng pu­lisya sa nangyaring barilan na nagresulta sa pagka­sawi ng apat-katao, ka­bilang ang isang pulis at pagkakasugat ng tatlo pa kamakalawa ng hapon sa Muntinlupa City.

Patay kaagad ang bik­timang si Santiago Mari­tana, 45, alyas “Ago” ng Binalot St., Purok I, Brgy. Cupang, Muntinlupa ha­bang hindi na umabot ng buhay sa Asian Hospital si PO2 Enrico Delmonte, 35 ng Police Community Pre­cinct (PCP) 2 ng Muntin­lupa police sanhi ng tina­mong dalawang tama ng bala sa likod na tumagos sa dibdib. Napatay naman ng mga nagrespondeng ta­ uhan ng SWAT ang dala­wang hindi nakikilalang suspect.

Nasa ligtas namang kalagayan sa Ospital ng Muntinlupa matapos ta­maan ng ligaw na bala sina Roland Lagaco, 21, John Larry Timoteo, 20 at Jacob Espina, 16, pawang mga estudyante na naki-usyoso lamang nang marinig ang putukan.

Batay sa tinanggap na ulat ni Senior Supt. Elmer Jamias, hepe ng Muntin­lupa City Police, nakatayo sa harap ng kanyang ba­hay si Maritana nang du­ma­ting ang apat na arma­dong suspect dakong alas-6:30 ng hapon at ka­agad na pinagbabaril ang biktima.

Narinig umano ni PO2 Delmonte na residente ng Kalye Abnoy, Purok I, Brgy. Cupang ang putukan kaya’t kaagad siyang lu­ma­bas, bitbit ang kalibre .45 baril at nakipagpalitan ng putok sa dalawa sa apat na suspect na hinahabol din ng mga barangay tanod.

Hindi umano batid ng pulis na nasa likuran niya ang dalawa pang salarin kaya’t nasapol kaagad siya ng bala nang paputukan ng mga suspect.

Nakatakas ang dala­wang salarin habang na­sukol naman ng mga nag­respondeng tauhan ng SWAT team ang dalawa pa na nagtangka pang man­laban at makipagpalitan ng putok sa mga awtoridad bago tuluyang napaslang.

Sa ginawang pagsisi­ya­sat, lumalabas na onse­han sa droga ang motibo ng pamamaslang matapos na hindi umano bayaran ni Maritana ang malaking halaga ng shabu na kan­yang kinuha sa sindikato ng illegal na droga. (Lordeth Bonilla)