Luneta iilawan sa solar panel
MANILA, Philippines - Malaki ang paniniwala ni Manila Mayor Alfredo Lim na malaki ang matitipid ng pamahalaang-lunsod sa sandaling matuloy sa Hunyo ang paggamit ng solar panel para sa suplay na kuryente sa Rizal Park o Luneta.
Sinabi ni Lim na nakatakdang magtungo sina Deputy Mayor Joey Silva at Bureau of Permits chief Nelson Alivio sa Quanzhou, China sa Abril 16-19 para paunlakan ang imbitasyon ng Centron Communication Technologies Filipinas Co. LTD upang obserbahan ang solar panel nito.
Nabatid naman kay Carlo Tan, Account Manager ng kompanya, ang naturang solar panel na nagkakahalaga ng P5 milyon ay libreng ikakabit sa malapit sa rebulto ni Ninoy Aquino sa Luneta kung saan awtomatiko itong magbubukas pagsapit ng gabi at ang enerhiya ay manggagaling sa araw.
Sinabi pa ni Silva na malaki ang matitipid ng lungsod kung saan ito ang kauna-unahang solar light na susubukan sa Maynila.
Posibleng sa Hulyo ay tapos na ang pagkakabit nito sa Luneta dahil may tatlong buwan din itong itatayo sa lugar. (Doris M. Franche)
- Latest
- Trending
