MANILA, Philippines - Matapos mag-angkinan ng sukli mula sa pamasaheng ibinayad sa jeep, isang lalaki ang sinaksak ng kapwa niya pasahero kahapon ng madaling-araw sa Navotas City.
Nasa kritikal na kondisyon at inoobserbahan sa Tondo Medical Center sanhi ng mga saksak sa katawan si Rommel Vergara, 39, ng Naval St., Agora Market ng lungsod na ito.
Ayon sa ulat, alas-4 ng madaling-araw, kasakay ng biktima ang suspek sa isang pampasaherong jeep kung saan nagbayad ng P20 si Vergara.
Pagsapit sa Naval St., ay nagsukli ang driver ng P13 subalit inangkin ito ng suspek na naging dahilan ng pagtatalo.
Nagbunot ng patalim ang suspek at pinagsasaksak ang biktima bago tumakas habang dinala naman si Vergara sa nabanggit na pagamutan. (Lordeth Bonilla)