Jobless na anak inatado ng ina

MANILA, Philippines - Agaw-buhay sa ospital habang isinusulat ito ang isang anak na tinad­tad ng saksak ng kanyang ina dahil sa kawalan umano niya ng trabaho at pagiging pabigat sa buhay ng huli sa Aeroville, NAIA Road, Pasay City kama­kalawa ng hatinggabi.       

Inoobserbahan sa intensive care unit ng Pasay General Hospital bunga ng mga saksak sa katawan ang bik­tima na si Armando Hayocan, 29, resi­dente ng Apollo St., Aeroville.         

Nabatid sa inisyal na pagsisiyasat na unang nagkaroon ng mainitang pag­tatalo ang biktima at ang kanyang ina na kinilala sa pangalang Esla, 52-anyos.   

Dahil sa krisis na dinaranas bunga ng kawalan ng mapagkukunan ng pang-araw-araw na panganga­ila­ngan, iminungkahi ni Esla kay Armando na maghanap ng trabaho para matustusan ang gastusin sa kani­lang bahay.    

Ang mungkahi ng ina ay dinam­dam umano ng biktima at nauwi sa palitan ng maaanghang na salita ng mag-ina.

Dahil dito, nagdilim umano ang paningin ng ina at nadampot nito ang isang patalim sa kusina at pinagsa­­ sak­sak ang anak. (Rose Tamayo-Tesoro)