UST coed tumalon mula 14th floor ng hotel, lasog

MANILA, Philippines - Basag ang bungo at nag­ka­­lasug-lasog ang katawan ng isang 20-anyos na estud­yante ng University of Santo Tomas (UST) matapos tuma­lon mula ika-14 na palapag ng isang hotel sa Quezon City.

Kinilala ng Quezon City Police District-Criminal Inves­ti­gation and Detection Unit (QCPD-CIDU) ang biktimang si Golda Margaret Me­dina, dalaga, nakatira sa Ibarra St., Sampaloc, Manila.

Lumilitaw sa imbestigas­yon, na dakong alas-10 kama­kalawa ng gabi nang ma­ganap ang pagpapakamatay ni Mar­garet mula sa 14th floor ng Fer­nandina Suites Hotel na nasa #232 P. Tuazon Blvd. Araneta Shopping Center, Cubao, Quezon City.

Dumalo umano ang bik­tima sa isang okasyon na “Gabi ng Parangal 2009” na inorganisa ng UST at ginanap sa nasabing hotel. Habang nasa kalagitnaan ang party ay nagkasundo ang biktima at mga kaklase na sina Fran­chesca Seneres at Valine Mae Calmerin na mag­tungo sa rooftop ng hotel ma­lapit sa may swimming pool.

Habang nasa rooftop ang tatlong magkakaklase, bigla na lamang humagulhol ng iyak si Margaret at naibida ang kan­yang matinding problema.

Upang mahimasmasan ang problemadong biktima ay   agad na kumuha ng tubig si Calmerin para painumin ito. Umupo naman umano si Mar­garet sa railings ng roof­top at bigla na lamang tuma­lon mula rito at bumagsak sa driveway at basement parking ng hotel kung saan unang bumagsak ang kanyang ulo.

Gayunman, ang kasong ito ay binubusisi pa rin ng pulisya.