Mga maton o siga imomobilisa ng NCRPO

MANILA, Philippines - Upang maging kapaki-paki­na­bang sinimulan na kahapon ng National Capital Region Po­lice Office (NCRPO) ang pag­gamit sa mga binansagang siga-siga sa kanto para maka­tuwang sa pagpapanatili ng peace and order sa iba’t ibang lugar sa Metro Manila.

Ito ang inihayag kahapon ni NCRPO Chief Director Leo­poldo Bataoil alinsunod sa direk­tiba ni Pangulong Gloria Macapagal Arroyo na gamitin ang mga siga sa peace and order para mapa­ kinabangan naman ang mga ito ng lipunan.

“We are now giving import­ance to this seemingly neg­lected siga-siga as members of our so­ciety. We give them recog­nition, we give them proper identifica­tion, we motivate them and then we give them responsibility, yun ang importante,” ani Bataoil.

Ayon kay Bataoil, inatasan na niya na pulungin ng bawat Chief of Police sa National Capital Re­gion ang mga siga sa kanilang mga hurisdiksyon at isailalim sa mga recovery program upang magbago ang pananaw ng mga ito sa buhay.

Ang mga siga-siga o mga tambay ay karaniwan nang nakiki­pagbasag-ulo sa mga kanto kung saan talamak ang mga ito sa Metro Manila lalo na sa mga malalapit sa mga squatters’ area.

Sa pamamagitan ng pag­pa­pahalaga para mapakinaba­ngan naman ang mga siga-siga, ayon pa sa NCRPO Chief ay ma-eenganyo o mahihikayat ang mga ito na siyang mamuno sa pagpapanatili ng kapaya­paan sa isang lugar kaakibat ng mga pulis.

Idinagdag ng opisyal na tu­tulungan ng NCRPO ang mga siga-siga na karaniwan na ring binabansagang mga maton tulad ng pagkakaloob sa mga ito ng kabuhayan, moral reco­very program at spiritural deve­lopment kung saan sasanayin ang mga ito ng mga pulis para mapakinabangan sa naturang programa .

Inamin din ni Bataoil na hindi naman kaagad agad na magi­ging perpekto ang organisas­yong itinatatag nila pero bahagi na rin aniya ito ng reporma upang mapalakas ang kanilang kampanya para maprotek­tahan ang mamamayan laban sa masasamang elemento na kalaban ng batas. (Joy Cantos)