Isang hindi pa nakikilalang lalaki ang nasawi nang masunog ang buong katawan sa loob ng nagliliyab na abandonadong gusali, sa Sta. Cruz, Manila, kahapon ng umaga.
Sinabi ni FO3 Wilson Tana na posibleng na-trap ang biktima nang masunog ang two-storey residential house, na may address na P. Guevarra St., Sta. Cruz, na nagsimula dakong alas-9:10 ng umaga.
Nabatid kay Tana na wala umanong nakakilala sa bangkay nang itanong sa kalapit na mga residente. Nakatakda na umanong i-demolish ang nasabing bahay na pag-aari ng isang William Payumo. Nagsasagawa pa ng imbestigasyon sa insidente upang matukoy ang pagkilanlan ng biktima at kung bakit ito nasa loob ng abandonadong bahay. (Ludy Bermudo)