Lolo pisak sa trak
MANILA, Philippines - Pisak ang katawan ng isang lolo habang sugatan ang isa pang lalaki makaraang araruhin ang mga ito ng isang trak kahapon sa Quezon City.
Dead-on-the-spot ang biktimang si Jose “Pepito” Antonio, 65, may-asawa, cigarette vendor ng Lot-2,Blk-35,Phase-2,Purok-19 Lupang Pangako, Payatas-B Quezon City.
Patuloy namang naka confine sa East Avenue Medical Center (EAMC) si Vicente Omana, 39, auto electrician at residente ng #96 ROTC Hunters Brgy. Tatalon Q.C.
Agad namang naaresto ang suspek na si Mario Custodio, 52 , driver ng Purok-V, Litex Rd. Brgy. Commonwealth, QC.
Base sa ulat ng Quezon City Police District (QCPD) Traffic Sector-1 naganap ang insidente bandang alas- 9 ng gabi sa tapat ng Edna’s Memories KTV Bar malapit sa kanto ng Victory St., Quezon Ave., QC.
Sinasabing minamaneho ng suspek ang isang Isuzu Forward Wing Van Truck (RFJ-665) na nakarehistro sa Tin-Tin Motor Works nang biglang tumawid ang dalawang biktima dahilan para masuwag ang mga ito. Dala ng takot na mabugbog ng taumbayan, tumakas ang suspek gayunman nahabol naman siya ng mga elemento ng QCPD Mobile Patrol.
Sasampahan ng kasong reckless imprudence resulting to homicide at physical injury ang suspek. (Angie dela Cruz)
- Latest
- Trending
