MANILA, Philippines - “’Wag niyo akong tularan, talamak akong drug pusher, bata ako ni Macmac Payapa.”
Ito ang nakasulat sa kapirasong karton na iniwan sa dibdib ng isang hinihinalang drug pusher matapos na barilin ito sa ulo ng hinihinalang “vigilante group” sa lungsod ng Pasig kahapon ng madaling-araw.
Ang biktima na natukoy sa pamamagitan ng kanyang mga kaanak ay kinilalang si Reynaldo Bartolome, 33, ng Velasco Ave., Pinagbuhatan Pasig.
Si Bartolome ay iniulat na itinumba ng hindi nakikilalang salarin sa may kahabaan ng Urano Velasco Avenue, Pinagbuhatan, Pasig City ganap na ala-1:20 ng madaling-araw.
Isinalarawan naman ng mga testigo ang suspek sa suot nitong bullcap, balingkinitan ang pangangatawan, nakasuot ng t-shirt, at maong pants.
Ayon kay PO3 Lardy Ignacio, may-hawak ng kaso, matapos ang pamamaril ay naglakad lamang umano ang suspek patungo sa Cattleya St., Pinagbuhatan bitbit ang baril na ginamit niya sa pagpatay sa biktima.
Tinangka pang isugod ng kanyang mga kaanak ang sugatang biktima sa Rizal Medical Center ngunit idineklara din itong patay ganap na alas-2:40 ng madaling-araw.
Magugunitang nitong Huwebes ganap na alas-8 ng gabi lamang ay dalawang hinihinalang holdaper din ang natagpuang may tama ng bala sa kani-kanilang mga ulo matapos na pagbabarlin din ng hinihinalang grupo sa may Caruncho Ave. sa harap ng Lianas Super market, Brgy. Palatiw, Pasig City. (Ricky Tulipat)