Isang 48-anyos na tricycle driver ang namatay habang sugatan naman ang mag-inang kanyang pasahero nang araruhin ng ten-wheeler truck na umano’y nawalan ng preno, sa Paco, Maynila, kamakalawa ng hapon.
Namatay noon din ang biktimang si Narciso Vasquez, ng Cristobal St., Paco, Maynila, matapos na mapitpit ang katawan nito.
Isinugod naman sa Manila Doctors Hospital si Rowena Barela, 42, at anak nitong si Nicolas, 8, ng Cristobal St., Paco, Maynila, na nabalian naman sa nasabing insidente.
Nakapiit na ang suspect na si Armiel Rito, 28, truck driver, ng Coast Wise Trucking Services at residente ng Rawis compound, Tondo.
Sa ulat ni SPO4 Mario Jorge ng Manila Traffic Bureau, dakong alas-3:30 ng hapon nang maganap ang insidente sa Cristobal St., Paco, Maynila. Sinasabi sa imbestigasyon na nawalan ng kontrol sa preno ang ten-wheeler truck (UGB 603) na mimaneho ni Rito sa pababang tulay patungo sa direksiyon ng U.N. Ave., at tuluy-tuloy ito sa nakahintong tricycle na may pasaherong mag-ina.
Nakahinto umano ang tricycle dahil hindi pa makadaan at hinihintay na makapagmaniobra ang isa pang sasakyang Elf truck na nasa unahan nito.
Nagulungan ang tricycle at kasamang napipi ang drayber at masuwerte namang tumilapon na lamang ang dalawang pasahero. Nadamay din ang anim na sasakyan kabilang ang dalawang pick-up, dalawang kotse at dalawang tricycle pa na nasa unahan ng tricycle ng biktima.
Mabilis na nadakip ang suspect na kinasuhan ng reckless imprudence resulting in homicide, two counts of physical injuires at damages to properties. (Ludy Bermudo)