Dahil sa tutol ang kanyang mga magulang na muli silang magsama ng kanyang mister, isang misis ang nagbigti sa Malabon City kamakalawa.
Patay na nang matagpuan ang biktimang si Analiza Jara-Patino, 32, ng A. Naval St., Brgy. Dulong Duhat ng nabanggit na lungsod.
Sa imbestigasyon ni SPO1 Bobby Mario Egera, Malabon City Police, dakong alas-5:30 ng hapon nang makitang nakabigti ang biktima sa inuupahan nilang kuwarto ng kanyang asawang si Cezar, sa Room 10, Domingo Apartment, Bernardino St., Concepcion ng nabanggit na siyudad.
Nabatid na tutol ang mga magulang ng biktima na magpatuloy pa ang pagsasama ng mag-asawa na naging dahilan upang maghiwalay ang mga ito.
Kahapon ay nagpunta ang biktima sa inuupahang kuwarto ng kanyang asawa at doon nagbigti. Inaalam na ng mga pulis kung may naganap na foul play sa pagkamatay ng biktima. (Lordeth Bonilla)