Sugatan ang isang ginang makaraang saksakin ito ng kanyang kinakasama ng tumanggi ang una na makipagtalik sa huli kamakalawa ng gabi sa Pasig City.
Kinilala ang biktimang si Myra Daymiel, 43, biyuda, residente ng Villa Raymundo, Brgy. Pinagbuhatan ng nasabing lungsod. Ito ay nagtamo ng dalawang saksak sa ulo at braso matapos na tarakan ng gunting ng kinakasama nitong si Jolito Basa, 39.
Sa ulat ng Womens and Children’s Desk ng Pasig police, naganap ang insidente dakong alas-8:30 ng gabi sa loob ng bahay ng magka live-in.
Nabatid na kasalukuyang nakahiga ang biktima sa kama ng tabihan ito ng kanyang kinakasama at ayaing magtalik subalit tinanggihan ito ng una dahil sa pagod umano ito sa maghapong pagtitinda.
Dahil dito, nagalit ang suspek sabay tayo ng higaan at kinuha ang gunting na nakalagay sa ibabaw ng cabinet ay dalawang ulit na sinaksak ang ginang na tinamaan sa ulo at kaliwang braso.
Nanlaban naman ang biktima at nakipag-agawan ng gunting sa suspek habang humihingi ng tulong sa mga kapitbahay. Sinuwerte na parehong ma babaw ang pagkakasaksak sa ginang kaya kinailangan lamang bigyan ito ng paunang lunas sa pinakamalapit na pagamutan.
Sa himpilan ng pulisya, mariin namang itinanggi ng suspek na ang pagtanggi sa kanyang makipagtalik ang dahilan kaya niya nasaksak ang kanyang kinakasama.
Nagmakaawa naman ang lalaki na patawarin siya ng kanyang live-in partner at sinabing nabigla lang umano siya subalit matigas ang desisyon ng babae na ipakulong ng tuluyan ang kanyang kinakasama. (Edwin Balasa)