1 pang LRT station sa Caloocan inaprub ni GMA

Pinuri kahapon ni Ca­loocan City Mayor Enrico “Recom” Echiverri si Pa­ngulong Gloria Ma­capagal Arroyo sa pag-apruba nito sa inihaing petisyon ng lungsod para magkaroon ng isa pang istasyon ng tren sa EDSA-Bagong Barrio bilang bahagi ng P6.322-billion Light Rail Transit (LRT) North Extension project o ang LRT-MRT Loop.

Ayon kay Echiverri, napapanahon ang pag­sang-ayon ni Pangulong Arroyo sa kahilingan ng lungsod upang magkaroon ng karagdagang istasyon dahil ito ang nakikitang pinakamabisang paraan ng mga taga-CAMANAVA (Caloocan-Malabon-Navotas-Valenzuela) para masolusyunan ang prob­lema sa transportas­yon at matinding overcrowding ng LRT-Monumento Central station.

“Lubos kaming natu­tuwa at sinang-ayunan ng Pangulo ang nagkaka­isang panawagan ng lung­sod, ng parehong pampu­bliko at pribadong sektor, lalo na ang 188 sama-sa­mang barangayan sa pa­ngunguna ni Liga ng mga Barangay president Rico­judge Echiverri,” aniya.

Panalo rito ang lahat ng commuters, higit ang mga taga-Bagong Barrio na itinuturing na isang Priority Development Area para sa mga proyekto at zonal improvement programs ng pamahalaang nasyunal, dagdag ng alkalde.

Sa pinakahuling kwen­ta ng Light Rail Transit Authority (LRTA), tina­tayang aabot sa P777 milyon ang halaga ng isang bagong LRT station.

Maso-solusyunan ng bagong istasyon ng LRT ang labis na pagsisiksikan ng mga pasahero sa Mo­numento station kasabay ang pag-aangat sa public mass transportation system na ito na environment-friendly pa, pahayag ng alkalde.