Tanod rumesponde sa holdap, napatay

Buhay ang naging ka­palit ng serbisyo ng isang 57-anyos na barangay tanod na rumesponde sa holdapan subalit nabaril at napatay, sa Tondo, Maynila kamakalawa ng hapon.

Hindi na naisalba ng mga doktor ng Gat Andres Boni­facio Hospital ang bik­ti­mang si Bonifacio Odon, ng Happy Land, Tondo bunga ng tina­mong bala sa dibdib.

Arestado naman ang suspect na si Brynner Rodri­guez, alyas “Bryan”, 23, binata, ng Bldg 11, Unit 49, Temporary Housing, Tondo.

Sa ulat ni Det. Joseph Kabigting ng Manila Police District-Homicide Section, dakong alas-4:30 kamaka­lawa ng hapon nang ma­ganap ang insidente sa panulukan ng Road 10 at Capulong Sts., Tondo.

Nabatid na habang nag­papatrulya ang biktima ay na­ aktuhan nito ang gina­gawang panghoholdap ng suspect sa isang pampasa­herong dyip kaya nag­tangka itong arestuhin ang suspect. Dahil sa nakitang ar­mado ang suspect ay nag­tago pa umano sa poste ang biktima at nang papa­lapit ito sa nasabing dyip ay agad siyang pinu­tukan ng suspect gamit ang kalibre .38 baril.

Mabilis namang sumak­lolo ang mga barangay officials sa lugar na ikina­dakip ng suspect na nag­tangkang tumakas.