Kritikal ang isang batang lalaki matapos tamaan ng ligaw na bala mula sa isang hindi pa nakikilalang suspek makaraang magkaroon ng rambulan sa kanilang lugar sa Caloocan City kamakalawa ng gabi.
Inoobserbahan sa Manila Central University Hospital sanhi ng tama ng bala sa ulo si Damiel Garcia, 8, ng 177 8th Avenue ng lungsod.
Ayon sa imbestigasyon ng pulisya, alas-7:30 ng gabi, nagrambulan ang tiyuhin ng biktima na si Ramon Garcia, 31, at mga kalugar na sina Reggie Mendoza; kapatid nitong si Roldan Mendoza; Joel Estrada at isang nagngangalang Edgar sa isang basketball court sa nasabing lugar, nang biglang may pumutok na baril.
Malapit ang bata sa mga nagrarambulan at minalas itong tinamaan ng ligaw na bala na naging dahilan upang dalhin sa nabanggit na pagamutan. (Lordeth Bonilla)