Patay ang isang kolumnista ng isang weekly tabloid habang sugatan ang kasama nitong GRO (guest relation officer) makaraang pagbabarilin ng isang hindi nakilalang gunman, kahapon ng madaling-araw sa Cubao, Quezon City.
Nakilala ang nasawi na si Leonilo Muriel, 47, kolumnista ng tabloid na Bagong Balita at dating photographer, at residente ng San Jose del Monte, Bulacan. Hindi na ito umabot ng buhay sa Quezon City Memorial Medical Center.
Ginagamot naman sa naturang pagamutan ang kasamahan ni Muriel na si Altea Villadolid.
Sa ulat ng Quezon City Police District-Homicide Section, naganap ang pamamaslang pasado alas-4 ng madaling araw sa may Pinatubo St., Cubao. Nabatid na kababa lamang nito at ng kasamang babae sa isang taxi (TEL-921) nang lapitan ng isang hindi nakilalang lalaki at sunud-sunod na pagbabarilin ang nasawi habang tinamaan naman ng ligaw na bala si Villadolid.
Nagsasagawa ngayon ng masusing imbestigasyon ang pulisya sa motibo ng naturang krimen kung saan ikinokunsidera ang posibilidad na kaugnayan sa trabaho nito bilang kolumnista o kaya naman ay posibleng dahil rin sa babae.
Sinabi ng publisher ng Bagong Balita na si Ric Bello na wala naman silang alam na death threats na natatanggap ni Muriel sa kabila ng mga pagbanat nito sa mga iligal na sugal at beerhouse. (Danilo Garcia)