3 poste nagbagsakan matapos salpukin ng container van

Naging masikip ang daloy ng trapiko kahapon sa lugar ng China Town, matapos na bu­mag­sak ang tatlong poste na kina­bibilangan ng poste ng Manila Electric company (ME­RALCO) at dalawang poste ng Philippine Long Distance Tele­phone (PLDT) nang bang­gain ng isang 40-foot container van sa Bi­nondo, Manila, kamaka­lawa ng gabi. Kabilang din sa mga na­pin­salang sasakyan ang ambu­lansiya ng Chinese vo­lunteers rescue unit (SET-289) at da­lawang fire truck na may pla­kang RDA-976 at CDY-749, na naka-park sa lugar.

Batay sa ulat ng Manila Traf­fic and Parking Bureau (MTPB) sa Manila City Hall, ang truck na (REE-732) na pag-aari ng Cirbed Freight and Brokerage Com­pany at mina­ma­neho ni Renato Balisi ay nabalahaw sa lugar hang­gang kahapon ng umaga sa kalye ng Quintin Pa­redes at Ongpin sa Binondo, dahilan para maging mabigat ang daloy ng trapiko sa lugar.

Bagamat walang nasaktan sa naganap na pagbagsak ng mga poste, dakong alas-11 ng gabi pansamantalang pinutol ang daloy ng kuryente sa lugar. Sanhi nito nagkaroon ng re-routing sa daloy ng tra­piko sa mga pampublikong sa­sakyan sa Jones Bridge, na direktang pinadaan sa Es­colta,habang ang mga pa­punta sa Jose Abad Santos Street ay pinadaan sa Juan Luna Street.

Nasa kustodiya ngayon ng MTPB si Balisi at sinampahan ng ilang kaso ng reckless im­prudence resulting in da­mage to property. (Doris Franche)