Isang 51-anyos na doctor ang binawian ng buhay nang sumalpok ang minamaneho niyang kotse sa isang poste sa ibabaw ng flyover matapos iwasan ang nakaparadang truck na nagkukumpuni ng ilaw kahapon ng madaling-araw sa Pasay City.
Namatay habang ginagamot sa San Juan de Dios Hospital ang biktimang si Jose Javier Suntay, ng Dacca St., BF Northwest, Parañaque City.
Naghihimutok naman ang mga kaanak ng biktima dahil bukod sa malagim na sinapit ng manggagamot, nilimas din ng ilang kawatan na nagkunwaring nagmamalasakit ang salapi sa wallet nito.
Lumabas sa imbestigasyon, pauwi na ang biktima lulan ng kanyang kotse na may plakang PNE-838 sa kahabaan ng Roxas Blvd. nang hindi napansin ang nakahimpil na truck ng Rayville Electrical Construction Corp., nagkukumpuni ng napunding ilaw sa poste ng Meralco sa ibabaw ng flyover.
Nawalan umano ng kontrol sa manibela ang biktima dahil sa sobrang bilis ng takbo kayat ilang ulit na umikot-ikot bago tuluyang sumalpok sa poste ng ilaw.
Sinabi naman sa pulisya ng driver ng Rayville Electrical Construction na si Eduardo Peralta, na muntik na rin siyang mahagip ng kotse dahil sinesenyasan niya ang mga nagdaraang sasakyan habang kinukumpuni nila ang pundidong ilaw, bukod sa inilagay nilang early warning device. (Lordeth Bonilla)