Arestado ang isang Tsinoy na sinasabing “supplier” ng droga sa ilang bus driver matapos itong maaktuhan kamakalawa ng hapon sa Malabon City. Nakilala ang nadakip na suspect na si Eduardo Tan, 24, ng Leongson St., San Roque, Navotas City.
Base sa report ng pulisya, dakong alas-4:30 ng hapon nang maaresto ang suspek matapos na magsagawa ng buy-bust operation ang mga tauhan ng Station Anti-Illegal Drugs-Special Operation Task Force (SAID-SOTF) ng Malabon-PNP sa panulukan ng C-4 Road at Orchid St., Brgy. Longos ng nasabing lungsod.
Nabatid na unang nakatanggap ng impormasyon ang mga tauhan ng SAID-SOTF hinggil sa talamak na pagbebenta ng ilegal na droga ng suspek kaya’t agad na nagsagawa ng surveillance operation ang mga awtoridad. Nang maging positibo ang impormasyon ay isinagawa na ang buy-bust operation na nagresulta sa pagkakaaresto kay Tan kung saan nakumpiska sa pag-iingat nito ang isang plastic sachet na naglalaman ng pinaniniwalaang shabu at ang P200 buy-bust money habang inaalam pa ng mga awtoridad kung saan kumukuha ang suspek ng kanyang mga itinitindang droga.
Napag-alaman na ang suspek ay supplier umano ng droga sa ilang tsuper ng bus. (Lordeth Bonilla)