Mistulang kinatay na hayop ang isang 39-anyos na lalaki makaraang pagsasaksakin ito ng patalikod ng isang lalaki na pinaniniwalaang sabog sa ipinagbabawal na gamot kahapon ng umaga sa Pasig City. Nakilala ang nasawi na si Rico Castillo, ng Blk. 15, Santos Malindinin, Kenneth Road, Nagpayong, Brgy. Pinagbuhatan ng nasabing lungsod. Pinaghahanap na ng pulisya ang suspek na nakila la lamang sa alyas na “Flattop” na kilalang adik sa shabu at kilabot na magnanakaw sa lugar. Ayon sa ulat, naganap ang insidente dakong alas-9:45 ng umaga habang naglalakad ang biktima malapit sa kanyang bahay nang biglang lumitaw ang suspek na nanlilisik ang mga mata at armado ng patalim na kung saan patraydor na sinakyod ng saksak ng ilang ulit ang biktima. Nang bumagsak na ang biktima ay itinihaya pa ito ng suspek at doon ay sunud-sunod pa rin itong pinagsasaksak. Matapos ang pananaksak ay parang walang anumang lumakad papalayo ang suspek bitbit pa ang ginamit na patalim. Nagsasagawa na ng masusing imbestigasyon ang pulisya hinggil sa naturang pangyayari at sa agarang pagkakadakip sa suspek upang papanagutin sa insidente. (Edwin Balasa)