Nagbigti ang isang 53-anyos na ama dahil umano sa matinding sama ng loob sa kanyang asawa’t mga anak dahil sa panunumbat ng mga ito na wala siyang trabaho, sa Tondo, Maynila kamakalawa ng gabi. Nakilala ang nasawi na si Luis Bautista, ng Model Community, Chessa St., Tondo.
Ayon sa ulat, dakong alas-6 ng gabi nang matuklasan ang pagbibigti ng biktima gamit ang isang lubid sa bisagra ng pintuan ng kanilang bahay. Nauna rito, Biyernes ng umaga ay nagtalo umano ang biktima at mga anak nito, dahilan upang pagbuhatan uma no ng kamay ng nasawi ang asawang si Angelina Bautista.
Naging dahilan ito kaya hindi na siya kinikibo nito. Gayunman, dakong alas-10 ng umaga nang huling makitang buhay ang biktima na nagkulong na lamang sa kanyang kuwarto.
Hinala ni Angelina na masyadong nasaktan ang kanyang asawa matapos silang mag-away-away. Dagdag pa rito na naging problemado at nalulong na sa alak ang mister simula nang nawalan ito ng trabaho at tanging mga anak niya ang naghahanap buhay. (Ludy Bermudo)